mazika lovers

wlcome all
 
الرئيسيةمحــــــــــامـاليوميةمكتبة الصورس .و .جبحـثالأعضاءالمجموعاتمحــا مــىالتسجيلدخول

شاطر | 
 

 انا هروح اسوق التوكتوك احسن

اذهب الى الأسفل 
كاتب الموضوعرسالة
غاوي حب
عضو شرف
avatar

عدد المساهمات : 115
تاريخ التسجيل : 15/08/2009

مُساهمةموضوع: انا هروح اسوق التوكتوك احسن   الجمعة سبتمبر 04, 2009 8:37 am

ترن ترن ترن ترن ترن

منبه بيرن زى سارينة الاسعاف و كائن عجيب نايم على السرير ما تعرف ده بنى ادم و لا رجل كنبة مكسورة

و اوضه مكركبة جداً ده لو اللى عايش فيها 10 فرخات بيتخانقوا على ديك يتيم مش هايعملوا فيها كده

ايه ده فى حد جاى من بعيد

و بصوت اقوى من صوت المنبه أحمد أحمد انت يا زفت يا احمد

الواد اتنطر من على السرير ايه فى ايه ؟

قوم المنبه سورنا

حاضر يا ماما بس سيبينى انام شوية

تنام ايه نامت عليك حيطة قوم ياض قامت قيامتك مش عندك امتحان

ايه ده اه صحيح الامتحان يخرب بيت كده هى الساعة كام يا ماما

الساعة 7 قوم بقى فى يومك اللى مش هايعدى ابوك لو طلع من الحمام و لقاك لسه نايم هاييجى يطحنك

ايه ده هو بابا لسه ما نزلش طب فرصه اقوم اخد منه فلوس قبل ما يمشى

فلوس ههه ضحكتنى و انا ماليش نفس اضحك

مالكيش نفس ليه يا حاجه هو الضحك بفلوس

اضحك على نيلة ايه ده سديتوا نفسى عن الدنيا كلها مش عن الضحك بس

راجل عامل زى المخبرين على باب الاوضة و كرشه قدامه مترين و صوته عامل زى موتور العربية الخربانه

سدينا نفسك عن الدنيا فارقيها و ريحينا

الهى انت يا بعيد هو انا قاعدة على دماغك يا راجل و لا باكل و بامسح فى راسك

هو انتى بتبطلى اكل عشان تفضى تمسحى ايدك حتى

ليه هو انا باكل اكتر منك ما تبص لنفسك بقيت عامل زى الوليه اللى حامل فى توأم من كتر الحش و انت قوم يا منيل منك لله سمعتنا كلام زى الزفت على الصبح

ايه يا جماعه ما تروقوا كده ده الواحد رايح امتحان ايه الاصطباحه دى بس

اصطباحة ايه و امتحان ايه اللى هاتروحوه انت فاكر نفسك هاتنفع

يا حاج اهدى كده بس و صلى على النبى

عليه الصلاة و السلام

و انتى يا ماما روحى اعملى لنا فطار

فطار ايه انا مش هاعمل حاجه انا رايحه لستك عشان النهارده السنوية بتاعة جدك يا دوب نلحق نروح الترب

روحى الهى ما توعى ترجعى من هناك لا انتى و لا امك

سامع ابوك بيقول ايه طب الهى الخارجه الجايه يا بعيد تبقى على روحك

معلش يا ماما بس انا هافطر ايه ؟ ده انا رايح امتحان يا ناس

ما تطفح اى حاجة ايه الطفاسة اللى انت فيها دى

يعنى هايجيبه من بره ماهو طالع لك

انت مش هاتهمد يا راجل انت فى صباحك اللى زى وشك ده

راح مشوح لها و دخل يلبس

بابا

عايز ايه يا نكد

المصروف

مصروف ايه يا حيلة امك

ايه يا بابا ده انا بقالى اسبوع ماخدتش منك فلوس

هو على طول هات هات مافيش مرة شوفتك جاى تقولى خد يا طور يا اللى داير فى الساقية ليل نهار عشان تطفحنا و تلبسنا و تعلمنا

ربنا يخليك لينا يا بابا

يا اخى ربنا ياخدنى و يريحنى منكم

الهى

بتقولى ايه يا وليه

باقول هات 50 جنية عشان مشوار الترب

يادى النيلة طب مالى انا بمشوار الترب

هو كل طلعة هاتنشف ريق امى على الفلوس كده ما تخلص يا راجل عايزين نلحق المواصلات و هى فاضية

خدى هما 20 جنية اللى فى جيبى ما حلتيش غيرهم

هات اللى يجى منك

ما حلتكش غيرهم ايه طب و انا هاجيب فلوس منين

مش مشكلتى اتصرف مع المحروسة امك

يا ماما هاتى اى حاجه ربنا يخليكى

خد هما 2 جنية الفكة اللى معايا

احمد احمد احمد

ايوة يا مصطفى وطى صوتك ابويا هنا

خلاص يا عم معلش بس يالا هانتأخر على الامتحان

ماشى يا سيدى اغير هدومى و انزل على طول

مين الجحش اللى بينهق على الصبح ده

ده مصطفى صاحبى جاى عشان نروح سوا الامتحان

ماشى يا اخويا اما نشوف اخرتها ايه معاك على الله تفلح السنه دى و تبقى اخر سنه فى الثانوية العمشة بتاعتك اللى مش عارف تاخدها

لا ان شاء الله يا بابا هانجح المرة دى و اجيب مجموع كمان

يا سيدى ان شاالله عن امك ما جبت مجموع المهم تنجح و تخلصنى و تترمى فى اى حته و تاخد شهادة و نخلص انا عارف ما قعدتش بعد الاعدادية ليه و نزلت تشتغل فى اى ورشه زى باقى العيال اللى حاسه باهاليهم . لأ ثانوية زفت على دماغك و يا ريتك فالح مش بهيم و بتاخد السنه بسنتين

طب ادعى لى يا حاج ربنا يوفقنى

راح بص له بقرف ادعى لك روح يا ابنى ربنا يوعد امك بطلاقها عشان ارتاح منها و منكم فى ساعة واحده و نزل و هبد الباب وراه

صباح الخير يا عم شوقى

اهلاً يا اخويا

هو احمد لبس و لا لسه

اهوه بيتنيل و نازل لك

صباح الخير يا مصطفى

صباح الخير هو ابوك ماله قرفان منى كده ليه

يا ابنى ابويا قرفان من نفسه و مننا و من امى مش عايزه يقرف منك انت

المهم عملت البرشام و لا لأ

ما انا سهران للفجر باعمله

طب تعالى نصوره على الله نعرف بس نطلعه فى اللجنه

لا ده احنا هانطلعه غصب عن عينهم ده انا مافتحتش كتاب امبارح قاعد عمال انقل الملزمة اللى الواد كريم جابها من الدرس

دخلوا اللجنه و ابتدى الامتحان و ابتدت التناحه و بوادر التخلف العقلى تظهر على وش احمد

حاول يمين شمال يطلع البرشام ماعرفش المراقبين كانوا عاملين زى الرادار مش سايبين حد فى حاله و كل شوية يقفشوا حد

و شوية و راح نايم على الديسك

مالك يا ابنى ما تحل

حاضر يا استاذ بس اصل و راح معيط

بتعيط ليه

اصل انا ابويا مات امبارح و من ساعتها و امى عماله تصوت ده انا حتى هاطلع من الامتحان على الدفنه

ابوك مات امبارح و جاى الامتحان النهارده

اه و الله يا استاذ

طب خلاص قوم روح الحق دفنة ابوك و ابقى امتحن دور تانى يا ابنى

لا يا استاذ انا هاكمل الامتحان ده انا باعيد السنه و امى مش ناقصة اجيب لها ملاحق كمان كفايه عليها موت ابويا . بس حضرتك لو ممكن اطلع حاجه كده اصرف بيها نفسى

عايز تطلع ايه ؟ برشام

معلش يا استاذ و الله ماكانش فيا مخ اذاكر . يا حبيبى يا بابا

طب طلع بس من غير ما حد ياخد باله ده انت قطعت قلبى يا ابنى ربنا يصبركم

ربنا يخليك يا استاذ و الله هادعى لك النهارده فى الترب

يعنى هاتدعى لى فى الحرم يا اخويا اخلص بقى بس ماتخليش حد من زمايلك ياخد باله

ولسه احمد بيطلع اول برشامه لقى مراقب الدور فى قفاه

انت بتعمل ايه ياض

مافيش يا استاذ و الله

مافيش . ورينى ايه اللى فى ايدك ده . برشام هو انا مش هاخلص كل شوية اقفش واحد فيكم

و راح مفتش احمد و لقى معاه كمية برشام تكفى ادارة تعليمية بحالها

المراقب من الصدمه ايه ده كله يخرب بيتك ده انت لو كنت ذاكرت فى الوقت اللى عملت فيه البرشام ده كله كنت طلعت من أوائل الجمهوريه

اعمل لنا محضر غش يا استاذ و هات لى كيس بلاستيك احط فيه برشام الاخ عشان ادبسه فى المحضر

يا ناس حرام عليكم ده انا ابويا لسه ميت بتعملوا فيا كده ليا

اخرس يالا

طب و الله ما انا ممتحن انا اساساً مش وش تعليم انا هاروح اسوق التوك توك بتاع ابويا و اخلص على الاقل يجيب همه بدل ما ابويا بيركبه و ما فيش زباين بتعرف تدخل فيه بلا تعليم بلا وجع قلب

و على فكرة بقى ابويا عايش ما ماتش





عقبال العيال اللى عندى فى المدرسة هما كمان قادر يا كريم

خلينى اخلص بقى

معلش طولت عليكم بس اهى تخاريف صيام و باطلعها عليكم
اِلي متى ترقُب و تصمُت يا قلمي...غدا ترى النزيف على جوانب الطُرقاتٍ منبثقُ...أكتب فأنت كل ما تبقى بيدي ما دام فى وريدى دماً" غـــــــاوي حــــــــ ب
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
niran
عضو شرف
avatar

عدد المساهمات : 343
تاريخ التسجيل : 16/08/2009
الموقع : وكوك الارض
العمل/الترفيه : كل شي الا يلي بتفكرو فيه
المزاج : حلوة ورايقة على طول

مُساهمةموضوع: رد: انا هروح اسوق التوكتوك احسن   الأحد سبتمبر 06, 2009 10:36 pm

نورت غاوي وحشتني كتير اهلين فيك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
انا هروح اسوق التوكتوك احسن
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
mazika lovers  :: قصص وروايات :: روايات-
انتقل الى: